平機會行政有幾混亂，基本上街知巷聞。根據審計報告所講，鄧爾邦未經政府批准就自把自為購買超豪人壽保險，去北京出差住嘅係每晚租金二千八百八十元嘅「大使套房」，其他大花筒行為多不勝數，總之就係一個浪費公帑嘅購物狂。人壽保險有幾豪呢？保額七百萬，保費三萬七，用嘅係納稅人血汗錢。

好嘞，今次嘅貴人係邊個呀？真係講出嚟你都未必信，貴人居然係特區政府第二把交椅，政務司司長唐英年是也。由於立法會政府帳目委員會對鄧爾邦表示「極度遺憾」吖嘛，所以唐司長有必要回應。之不過咁，唐唐冇怒髮衝冠踩多腳，而係以一種無微不至嘅慈母式關愛幫鄧爾邦擦屁股，佢話喎，接納平機會管治委員會嘅建議，繼續容許主席購買額外人壽保險，而且追溯批准歷任主席都可以享受呢種福利。

係咪好得意呢？所謂追溯批准，意思其實就係，你事前未經批准假公濟私吖嘛，得得得，冇問題，阿媽幫你收拾殘局，唔理你係幾咁胡作非為，我事後批准你咪得囉。呢鋪真係，邦邦遇唐唐，唐唐照邦邦，簡直就係愛心爆棚嘅補鑊行為。

成日都話，不問自取是為賊也，未經批准即係不問自取啦，唐英年會唔會以同一態度縱容賊佬呢？假設，有人潛入政務司司長官邸爆格，不問自取偷咗大量金銀珠寶，然後人贓並獲畀警察捉咗，唐唐會唔會向法官求情話個賊佬得到佢追溯批准呢？明察秋毫嘅法官又會唔會接納呢？

阿媽幫衰仔擦屁股，本來都冇乜所謂，世上只有媽媽好吖嘛。之不過咁喎，慈母多敗兒，唐唐既然咁關照邦邦，反映咗一個殘酷嘅現實，縱壞晒嘅平機會冇得救㗎喇，行政混亂永遠冇可能改善，你畀人求愛不遂性騷擾咩？唔好奢望自廢武功嘅平機會可以為你出頭討公道。

話時話，鄧爾邦無論有幾多貴人，明年一月點都夠鐘要執包袱，新主席會係邊個呢？遴選委員會主席梁智鴻話喎，平機會主席一職並無內定人選，會先由獵頭公司收集所有申請人嘅詳情，再交畀遴選委員會揀擇，確保過程公平公正。

吖，唔知點解，功夫茶硬係聞到一陣古怪味道。你知啦，政府揀蟀好過癮㗎，好似遴選新任金管局總裁咁，明明人選來來去去得一個陳德霖，佢哋夠膽死話，人選其實有好多好多㗎，不過冇一個知道自己入選之嘛。

點都好啦，既然慈母多敗兒，功夫茶預祝新主席百厭鬼上身為所欲為。唔使怕喎，反正唐唐發明咗追溯批准呢一招，理得你有幾百厭吖，全部可以事後補鑊，勁過矇查查失身之後家計會送你一粒事後丸。