華仁戲劇社今、明兩晚喺演藝學院有好戲上演，為重建校舍籌款，尋晚所有演員着好晒戲服綵排，醫院管理局主席胡定旭扮演嘅丞相、立法會議員梁家傑扮演嘅越官同合和主席胡應湘夫人胡郭秀萍演嘅公主，喺出台之前都仲係四眼嘅，真係十分搞笑。
有份演出嘅雖然唔係大明星，但係個個都係大忙人，為咗綵排，個個都爭分奪秒，好似肥胡咁，佢去到後台趁換衫空檔先得閒坐低扒幾啖大會供應嘅叉燒飯盒，絕對係放下身段。做皇帝嘅馬會主席陳祖澤，戴完王冠又要戴鬚，喺繁忙又人多擠迫嘅後台穿插，都無詐型。
今次第四次粉墨登場嘅肥胡，廿幾卅年前仲係中五仔第一次踏台板做小太監，時至今日佢「加官晉爵」做丞相，向來幽默嘅佢三句不離本行︰「依家醫學昌明，做完太監返出嚟可以做丞相。」呢位醫管局主席真夠搞笑。「公主」胡太猛咁話緊張，實則做足功課，單係fing水袖已經練咗半年，相當勤力。平時執到正嘅梁家傑，上到台頂帽忽然向後褪，露咗個頭箍出嚟，搞到對手忍唔住笑，唔知佢係咪想考驗下對方忍笑能力呢？