尋日立法會開會，去到村代表選舉條例草案恢復二讀辯論嘅時候，立法會主席突然話因為局長唔喺會議廳，所以要暫停會議。等咗六分鐘之後，曾德成先至急急腳趕到，事後佢話因為遇到交通問題，等又人多，會議進度又比想像中快，加上計錯時間先至遲到喎。

點知遲到事件一不離二，尋日朝早喺立法會回答過質詢嘅周一嶽，下晝再輪到佢發言時竟然唔喺現場。立法會主席惟有再度休會，仲暗寸兩個局長話，「可能官員喺新一年度未習慣議員咁勤力啦」。周一嶽最後都遲咗四分鐘，佢話自己期間過咗九龍開會，雖然經西隧返港島，但遲到就係遲到啦！

局長遲到，議員當然掩住半邊嘴笑，政務司司長唐英年不得不維持秩序，叫啲局長日後去立法會開會，要預鬆啲時間。