數數人頭共有十一人咁多，包括「精英大師」馬主施雅治太太、前警務處副處長黃燦光夫人、恒和珠寶陳聖澤太太、前東華主席余嘯天太太等。孫太為私隱着想，包咗間掛有金葉子吊燈及威尼斯風情畫嘅房食飯，班太太傾偈可以自由啲。

已約萬聖節搞舞會

「意寧谷」兩次奪得意大利以外最好的意餐廳大獎，廚師都係人中翹楚。孫太瞄準Set Lunch出擊，點咗招牌雜錦頭盤及海鮮意大利飯，施太就點咗墨魚汁麵，亦有人指定要食招牌菜燒香草羊架伴芥末意大利酒汁配玉米粥。埋單計數，每人盛惠約三百五十銀，不過「心連心」有個規矩，出席名太輪流請食飯，今餐就由余嘯天太太埋單。

開餐完畢，孫太順便評吓菜式，佢話，Nicholini's 係好味，不過唔係佢嘅至愛，上環著名法國菜Bonheur先至係首選喎。阿太們食完呢餐，轉頭已約定十月三十一日晚去馬會會所舉行萬聖節化裝舞會，節目認真多。

其實Nicholini's的確甚得阿太歡心，公大校長梁智仁嘅太太兼名廚梁許安璞（Annie）尋日亦喺度開餐，原來佢約咗一位美女作家朋友。Annie大讚Nicholini's食物有水準，佢早前亦喺港麗酒店嘅餅房學整甜品喎。

孫公大談湊孫心得

孫太以美食會友，老公教育局局長孫明揚就馬不停蹄推銷微調教學語言方案。

尋日孫公出席東華午餐，大談湊孫心得，佢話教小朋友唔使太死板，為咗令只有幾歲大嘅孫仔認字，佢會指住巴士路線號碼，然後叫孫仔分別用中文及英文讀出嚟，孫仔見咁好玩，學字不知學得幾快喎。

卓妮