呢啲一大筆一大筆嘅錢，一分一毫都由公帑支付，係納稅人嘅血汗錢，如果筆錢拎出去可以收番成本效益，有助香港長遠社會同經濟發展，相信市民都唔會反對，不過如果因為政府弱勢，要割地賠款，市民就唔多服氣。難怪立法會環境事務委員會委員陳偉業質疑，如果今次係為咗爭取部分人嘅政治支持，做法就等同利益輸送，值得商榷。

公文袋立法會議員梁家傑尋日喺發展事務委員會政策簡報會上，亦質問發展局局長林鄭月娥基於乜嘢原因提高補償級別。林鄭解釋，提高補償係由佢擔任主席嘅政府內部委員會所下嘅決定，佢又話，這已經係政府第三次收地時提高補償至甲級嘅個案，呢啲個案全部要有充足嘅理據，並要滿足一定條件，每次都係用同一把尺，而高鐵屬全港性項目，所以合乎要求。將賠償類別提升到全港性項目咁高，想唔甲級賠償都唔得喇。

失管治威信　貼錢買難受

政府除咗諗住用錢擺平菜園村居民外，前日行會更「賣大包」全盤通過紀律部隊職系檢討報告，八成紀律部隊人員即時變相加薪，警長及其他部隊的相若職級更可獲兩個增薪點，令政府每年要增加七億八千五百萬元嘅額外開支。不過，政府呢次花錢同樣搵來雙輸局面——政府向紀律部隊屈服，輸了管治威信；紀律部隊靠嚇爭薪，輸了公義形象。

其實，政府與其花咁多錢買難受，倒不如推出真正嘅利民措施博取掌聲仲實際啦。