李霖恩話，尋日光哥喺中午食晏時間已經趕咗去醫院見個孫女，光哥見到ＢＢ嗰刻非常感動，不自覺扮吓鬼臉吓孫女，表情成個細路仔咁，當堂無咗做保安局局長嗰種官威。

李霖恩幫囡囡改咗個英文名叫Gianna，意喻呢個係「神賜的禮物」，不過中文名就未改，話要留番畀光哥呢個爺爺親自操刀喎！光哥就透露，已經諗定咗幾個好名畀小Gianna，但依家仲未揀定用邊個。尋日光哥六點幾收工，仲親自接埋榮升太嫲嘅李媽媽一齊去醫院探小Gianna，四代同堂，真係要幾幸福有幾幸福！

不過小Gianna嘅幸福點止呢啲吖！我哋搵咗堪輿學家麥玲玲幫Gianna呢個小牛女算過命，麥師傅話小Gianna天生有運行，由廿一歲就會行大運行到六十歲。

另外，麥師傅計出Gianna命格屬水，有七剎星當旺，天生有運動天分、紀律性強，仲非常有領導才能，可以去外國留學，大個咗仲好大機會喺政治方面發展添。咁睇嚟，小Gianna分分鐘可以繼承光哥嘅衣鉢噃。