香港大學校務委員會換主席，由港大舊生梁智鴻擔此大旗，金刀梁本身職務繁多，除了係泌尿科專家，公職一籮籮，亦是行政會議非官守議員、安老事務委員會主席、人類生殖科技管理局主席、廉政公署事宜投訴委員會委員、香港愛滋病基金會主席等，現在加上港大呢頂帽子，相信會更加忙碌。不過金刀梁似乎係「多啲嚟、密啲手」嘅表表者，已屆古來稀之年嘅佢，既不言倦亦不言休。
金刀梁尋日由北京睇完閱兵回來，一個人拖着旅行篋坐機鐵入巿區，瀟灑之餘還健步如飛。佢話十一月七日會正式接替卸任嘅馮國經，對於馮國經成功令港大在國際排名上「升呢」做亞洲第一學府，過去現在均對母校「一條心」的金刀梁，大讚馮國經「做到嘢」！不過向來幽默嘅佢轉身又搞笑話︰「我依家好驚，好擔心無佢做得咁好！但係我會盡力。」金刀梁弟弟梁智仁醫生現任公大校長，兩兄弟同是出身自醫生世家，所謂虎弟無犬兄，金刀梁話驚看來都是搞搞笑罷了！