大家可能會話，香港嘅公立醫院的而且確失誤多多，出錯當食生菜，醜聞長爆長有，之不過咁喎，前排財爺曾俊華心臟病發，瑪麗醫院表現幾好吖，通波仔手術十分順利，成功救番鬍鬚曾一命，算係省靚招牌啦。冇錯，曾俊華冇因為醫療失誤而少咗任何一個器官，但係唔好唔記得，佢係高官ＶＩＰ，瑪麗醫院梗係打醒十二分精神啦，換轉係升斗小市民，未必有咁細心周到嘅一流服務噃。唔信？睇吓一單最新嘅個案吖。

早前有一位斜坡維修工人阿堂，懷疑工作期間被蟲咬，又發高燒，又出紅疹，睇勻中西醫都搞唔掂，然後走去瑪嘉烈醫院求診。留院五日裏面，醫生日日抽血化驗，左驗右驗上查下查，始終冇辦法搵出病因，即係冇得對症下藥。喂，五日喎，一百二十粒鐘喎，萬一咬阿堂嗰條係超級毒蟲，死得人㗎噃，再等落去咪形同等死？

唔係喇，阿堂嘅屋企人心諗，再拖落去唔係辦法，一於博一博，送佢返內地醫院求診。結果，阿堂急急腳出院，跟住急急腳去到廣州醫科大學南方醫院。內地醫生睇得兩睇，驗得兩驗，得咗！明晒！第二日即刻有確診報告，原來阿堂患嘅係恙蟲病，引發中毒性肝炎、低蛋白血症同埋慢性乙型病毒性肝炎等等。既然知道係乜病，當然知道用乜藥，終於藥到病除，醫生妙手回春。根據阿堂嘅講法：「簡直係死過翻生！」

呢件事反映咗乜嘢問題？一係香港醫生見識少，根本唔知道小小一條恙蟲可以置人於死地；一係香港醫生懶懶閒，抽血化驗求求其其，拖咗五日仍然乜都查唔出。傳染病專科醫生勞永樂話喎：「可能香港少綠化地方，每年個案唔多，唔似內地醫生成日見，好快就可以判斷。」

唉，你話係咪死火吖，雖然話香港綠化地方唔多啫，不過蚊叮蟲咬始終係好常見嘅，以後有人中招，邊有信心求醫呀？更加得人驚嘅係，原來根據衞生署規定，恙蟲病屬於法定呈報傳染病之一，嚴重者可致死。既然瑪嘉烈醫院烏厘單刀矇查查，即係延誤治療啦，即係唔會通報啦，即係有可能傳染開去啦，死多幾錢重！

講開又講，曾蔭權又話醫療係香港六大優勢產業之一，仲話即將發表嘅施政報告會提出發展方向，點解好似內地比香港更加有優勢咁嘅？香港驗極都驗唔出，內地一查即查到，煲呔曾瘀爆鏡好冇面啫。

計功夫茶話齋，醫院唔識驗蟲，等於累到優勢產業捉蟲，曾蔭權都唔知點樣自圓其說！