尋日高醫生出席香港政府舉行嘅慶祝酒會，一講到領匯就皺晒眉；如果大家有留意都知道，高醫生唔係啲小小事就亂咁向人開火嘅人，所以從佢開腔批評領匯，就知道呢件事令佢有幾激心。高醫生話明白一間上市公司，好多嘢要喺股東利益角度出發，但領匯唔止係上市公司咁簡單，仲有一定社會責任要承擔，所以加租加幾倍就唔應該嘞！高醫生諗極都諗唔明，話呢啲完全唔似純商業決定，實在唔知領匯搞乜鬼。

高醫生除咗出口幫同行和街坊外，仲打算將語言轉化成實質行動；佢話如果遲啲醫生搞任何抗議行動，必定親身支持。其實之前立法會醫學界代表「怪醫」梁家騮都要求政府買番領匯，救一班街坊於水深火熱之中，無奈政府闊佬懶理。唔知高醫生今次加埋把口，會唔會鬧醒政府呢？