福建幫頭領盧文端尋日帶埋老婆仔女一齊喺北京睇閱兵，但就因而錯過咗喺香港拉頭馬嘅機會。不過盧文端話一啲都唔覺得可惜，因為頭馬幾時都有得拉，閱兵就十年先有一次睇，加上十年後佢肯定會退下全國政協職務，相信再冇機會睇第二次，自然要好好把握今次最後機會。
尋日「十‧一」有馬跑，盧文端匹愛駒「福建王子」喺第四場跑出贏頭馬。練馬師事前已經同佢預告隻馬狀態唔錯，有一定機會跑出，但由於佢要上京睇閱兵，只好拜託同屬福建幫嘅政協常委洪祖杭，越洋幫佢用電話投注買咗一萬蚊，最後派咗六萬六千幾，加埋二十七萬幾嘅頭馬獎金，合共袋咗接近三十四萬，好和味。
盧文端話，對上一次拉頭馬已經係年幾兩年前嘅事，加上今次喺現場睇閱兵睇得好高興，可謂雙喜臨門，返到香港一定要慶祝吓！