之前客串做過DJ嘅肥亨，下星期六正式有自己嘅節目出街；同之前嘅唔同，呢個係肥亨辭官後第一次受薪工作，佢亦從此告別無薪嘅義工工作。去年被港大請咗做經濟金融學院榮譽教授嘅肥亨，新節目叫《馬教授，你好！》，一於由馬局長搖身變成馬教授，肥亨仲請咗幾個大學生同佢一齊做主持，大家會就時下一啲熱門事件，例如G模效應同青少年吸毒等等嘅問題交流吓意見。

肥亨會成立一個基金，佢會將以後所有工作得番嚟嘅報酬放喺呢個基金度，以作慈善用途。為咗令基金「身家豐厚」啲，肥亨更會積極考慮接多啲受薪工作，只要不太操勞，而又係佢熟悉有興趣嘅工作，佢都會好積極考慮，實行幫基金打好根基咁話，以肥亨咁搶手，一定有好多人已經向佢招手喇。