教育局局長孫明揚官場資格老，一直都係政務司司長第一號「替工」，前兩日政府高官上晒北京參加建國六十周年慶典，孫公就要身負重任署理政務司司長職務。尋日孫公晨咁早去完灣仔金紫荊升旗禮，下午又回復局長身份到尖沙咀文化中心出席青年學生音樂會。
唔知孫公無得上京睇閱兵會否覺得可惜呢？孫公就以一貫輕描淡寫話：「咁總要有人留喺度，留守大本營嘛！」雖然未能親身上京睇閱兵，但孫公話睇電視直播，已經感受到壯觀場面，同十年前親身上京睇閱兵比較，好多嘢已經唔同晒，現在幾乎全部都係國產新型武器，好多都係以前未見過。
孫公因為要做替工，所以都未得閒約實兩個寶貝女明日返屋企食飯共慶中秋節，話要過埋尋日至算喎。咁孫太鍾小芬又會煮乜嘢拿手好餸做節呢？孫公諗一諗然後話：「都無乜點整嘢㗎喇，因為平時都食得好好，咪食吓月餅應吓節囉！」