不過任總仲未開始發功，大批支持者已率先透過網上留言，主動幫網主發炮，圍踩煲呔曾同佢嘅繼任人新任金管局總裁陳德霖，令網誌變咗成個反政府基地咁。

指退休後「庸才充斥」

任總個網誌開張短短廿四小時，雖然只係上載咗一篇閒話家常嘅歡迎辭，已經累積咗過百名網民回應同留言，當中大部分都係讚揚佢嘅任內工作，祝願佢退休生活愉快等，但亦有唔少人其實明褒任總、暗踩煲呔曾同攞命陳嘅，包括形容佢係「極少數有能力嘅政府官員」、「香港最能幹嘅領導人」，甚至建議佢參選特首等，又話任總已成為金管局甚至香港金融中心嘅象徵標誌，佢退休後香港「庸才充斥，怎不令人擔心」，仲質疑「庸人怎處理港人金庫，會否一落千丈呢？」

有網民更加用唐代名將郭子儀嚟比喻任總，除咗因為佢喺金融風暴中成功擊退國際大鱷，同當年擊退外敵嘅郭大將軍有得揮之外，郭子儀經歷四朝皇帝而不倒、「功高蓋主而主不疑」嘅事迹，估計都係網民攞佢嚟同任總比較嘅原因。

任總喺歡迎辭中自爆唔識中文輸入法，立即有超過十名網民自薦教佢打中文，或者好熱心介紹學習網站同軟件畀佢，可見佢幾咁受歡迎。不過亦有網民質疑佢過往人工過高，仲貴過美國聯儲局主席，當年打大鱷淨係識得用「任一招」扯高拆息。相信等任總喺十月中外遊返港正式動筆撰文後，啲留言內容肯定會更加精彩同到肉！