北京尋日朝舉行建國六十周年閱兵儀式，港澳台三地都派出花車參加巡遊，當中以澳門花車最靚，最差就係香港。香港花車上只擺放着幾幢香港特色建築物，而且顏色單調。有份出席閱兵儀式嘅立法會議員葉劉淑儀，睇完香港部花車後都皺晒眉話：「得啲好似紙紮咁嘅會展中心、國金中心，毫無主題，毫無創意，實在令人失望，澳門嘅都好過我哋；十年前香港花車又係咁嘅色，真係無乜進步喎！」港大校長徐立之講到香港花車就臉有難色，大彈花車顏色好淡，反而現場唔少人大讚澳門花車有睇頭。
唔知港府係咪收到風有人大彈香港花車，尋日下午急急出新聞稿，詳盡解釋香港花車嘅設計，原來花車仲有屏幕播放著名導演劉偉強和杜琪峯拍攝嘅短片，可以講係「名片頭，掃把腳」。
不過，陳振彬就話，聽聞內地有部分花車製造費高達二千萬元，試問香港怎能用二千萬去製作一部花車吖？向立法會申請撥款唔使旨意通過。
卓妮