本文重點
千呼萬喚始出來！卓妮唔係講緊尋日十月一日北京天安門嘅閱兵儀式，而係北京頭上嘅一片藍天，由連日來陰霾密布，細雨綿綿，前晚仲落咗場大雨，到尋日朝早變為藍天白雲，風雲變色令在場觀賞閱兵嘅人大政協等觀禮港人為之驚嘆，連港大校長徐立之亦大開眼界：「天空變藍咁都做得到，中國真係乜都得！」不過，藍天就為一眾賓客在沒有防備下暴曬四小時日光浴，但大家曬得好開心。
范太話反映國力強大
人大政協及香港各界觀禮團尋朝分三批出發，觀禮團成員晨早六點半就浩浩蕩蕩出發到天安門，經過前晚人工消雨措施後，原本多雲多霧天色已漸變為藍天。第三次上京睇閱兵嘅行政會議召集人梁振英（CY）最為驚訝，估唔到一夜之間有咁大變化，一起床就見藍天白雲，太陽高照，搞到個個曬到燶晒，國家控制天氣真係神乎其技！CY在城樓上觀看整個閱兵儀式後，覺得最震撼就係尾段小朋友放氣球上天空，然後衝上金水橋，隨即奏起愛國歌曲《歌唱祖國》，代表中國未來一代，令人扣人心弦。
同樣在城樓上嘅全國人大常委范徐麗泰就話，最感動係體會到國家國力強大、人口眾多，才能組織動員到咁大規模嘅群眾，而五十個少數民族跳舞，亦反映國家嘅包容。城樓上人頭湧湧，范太話好開心見番多位老朋友，包括海協會會長陳雲林、前外長唐家璇及李肇星、前中聯辦主任高祀仁等。
閱兵場面咁震撼，范太都要帶備數碼相機，影閱兵又影埋花車巡遊，影咗成六十至七十張相。卓妮在現場所見，太陽曬得好緊要，但好多嘉賓都無做防曬準備，個個都用場刊來遮蔭，但行會成員查史美倫好醒目，帶定太陽帽防曬。
天氣曬就係曬咗啲，但香港青年事務委員會主席陳振彬（Bunny）就話大家曬得好開心，享受最痛快最長嘅日光浴，個個曬到臉紅紅。
Bunny話，除咗藍天令大家驚嘆外，仲有意外收穫，事關原本港府預告話閱兵要企五至六小時，但去到現場有櫈坐，企起身反而被在場保安勒令坐低，港區代表今次安排坐在東面最前嗰幾行，好近城樓廁所，大家都好暢快。
卓妮