港股做好重上二萬點樓上，新股又排住隊上市為港股升勢試溫，但升勢似乎欠缺支持，好多商界大孖沙對入市仍持謹慎態度。有玩開股票嘅「牛仔褲大王」楊釗都話，雖然香港經濟最壞情況已經過去，但前景仲未睇得通透，相信係虛火居多，所以佢仲未敢入市，繼續避風頭，楊釗唔敢入市等於用行動對財金官員發表嘅「經濟曙光論」投下不信任票。
楊釗透露，去年金融海嘯爆發後，自己都驚咗要「避一避」，事關他自嘲「無技術，又無膽量」，唔夠膽貿然在波濤洶湧情況下入市。楊釗話，現時旗下生意主要集中在內地，主打房地產及零售業務，目前全國約有二千個銷售據點，規模相當龐大，由於休閒服需求愈來愈大，所以休閒服飾成為重點銷售項目，反而幫佢起家嘅牛仔褲銷售比例縮減至兩成。
楊釗做生意有聲有色，呢個世界啲錢係賺唔晒嘅，既然睇唔通股市，不如腳踏實地做生意，睇通至落手，可能就係楊釗發達嘅原因嘞。