功夫茶靈光一閃又有一個諗法，萬一警方繼續束手無策，硬係捉唔到旺角擲鏹狂徒，下次難保冇人掟個榴槤落街，後果不堪設想咯。你知啦，好多人好變態㗎，一次捉唔到，兩次捉唔到，三次捉唔到，佢哋就會喪心病狂愈玩愈大。

因乜事幹提起旺角擲鏹事件？哦，冇嘅，因為高空擲物投訴不絕，良好市民煩不勝煩咁解囉。呢嗱，就好似彩雲邨咁，有一戶姓陳家庭長期受害，陳家陽台由○五年開始不斷出現空襲。狂徒掟啲乜嘢落街呢？該煨咯，唔係鏹水，唔係榴槤，而係女性衞生用品！

雖然女性衞生用品斷估唔會掟得死人啫，之不過咁，核突吖嘛，肉體未必受到好大傷害，精神就受到好大折磨。假如受害者有些少迷信，甚至會認定自己行衰運一定同呢啲污糟邋遢核突嘢有關。

陳家不斷受到高空擲物滋擾，自然反應梗係向房屋署投訴啦。房屋署係就係有巡查呀，不過查來查去得個吉。最搞笑嘅係，彩雲邨原來早於○二年已經安裝咗「天眼」，點不知竟然係廢嘅，完全無助緝兇。

講真，彩雲邨陳家算係不幸之中嘅大幸，功夫茶記得，有一家人比佢哋不幸十倍。今年五月喎，梨木樹邨有一位麥太，同個仔落街抖涼，一心諗住悠悠閒閒享受周日假期啦。去到下晝四點左右，麥太抬頭一望，咦，有個單位火燭喎。再望真啲，咦，火燭嗰個單位竟然係自己屋企！麥太當然一個箭步衝返屋企救火啦，不過救完都已經滿目瘡痍嘞。麥太懷疑係樓上有人好缺德咁樣亂掟煙頭落街，所以燒到佢損失慘重。可惜吖，唔知警方係太懶定係冇信心破案，一句「起火原因無可疑」就收隊。

唉，又難怪警方冇信心㗎，大家知唔知高空擲物嘅破案率有幾高？百分之二十幾咋，少得可憐。

呢嗱嗱嗱，問你驚未？天眼又冇用，警方又懶理，全港咁多高樓大廈，你點知邊度會遇到空襲㗎？警方破唔到案，等於變相鼓勵行兇，咁就雞犬不寧咯！

講番旺角呢個高空擲物重災區吖，其實唔止鏹水，當地一帶曾經掟落街嘅物件種類繁多，磚頭又有，鉸剪又有，滅火筒都有。警方如果唔去積極提升破案率，肯定人人自危，唯一最開心嘅係陰陰笑嘅冷血狂徒！