鄧竟成做咗警隊一哥，負面新聞不絕。前警務處處長李明逵尋日被記者問到，會唔會作為前輩教吓一哥點處理呢啲新聞，佢本來耍手擰頭話：「佢一定識處理啦！我使乜教佢做呀！」但之後又語重心長咁話：「其實做一哥經常都要遇到多元化嘅事，總有困難嘅時間，不過唔好怕困難，要正面啲睇。」鄧竟成不妨參考吓。

無官一身輕，退休之後嘅李明逵好開心咁話，以前公務繁忙，好少時間做運動，依家就多咗好多時間去游水、健身，而且每星期都可以打三場網球，尋日仲同民政事務局常秘尤曾家麗一齊出席運動推廣活動。

尤太就同記者呻，話做餐死都冇人知東亞運幾時開幕。佢透露稍後會再招募更多年輕運動員同傷健運動員做推廣大使，下月中會公布詳細情形，下星期又會同的士團體合作，由旅遊界幫手宣傳。