曾醫生尋日出席「世界心臟日」嘉年華同記者講，以前每星期會約醫生朋友打番場網球或者羽毛球，但豬流感一爆就無呢支歌仔唱，但係佢又怕磅數勁升，於是決定每餐只食七成飽，食少啲肥膩嘢同食多啲菜，仲要飲多啲水，等個肚有飽嘅感覺，可以食少啲。雖然做少咗運動，曾醫生屋企都有一套簡單健身器材，希望每日有半個鐘Keep fit。

同樣都係醫生嘅立法會議員梁家騮就身體力行做運動，為咗出席同一場合，昨日同兩位醫生好友以超快成績，完成麥理浩徑第七段。佢話呢段路長十六公里，一般要行六個鐘先至行得完，尋日佢哋只用咗三個半鐘就行晒，仲可以返屋企沖完涼先至到會場。

不過佢無大讚自己體能超晒班，反而話尋日嘅活動有意義，點都會趕嚟支持吓，好彩無遲到添。