自由黨尋日喺北角寶馬山搞咗個健康檢查日，黨主席劉健儀（Miriam）及常委田北辰身先士卒驗吓身，田二少自爆兩次秘密通波仔，加上父母分別患有心臟病及肺癌，佢每隔三個月就由頭驗身驗到落腳，仲密過家計會呼籲。Miriam亦直認患有高血壓，要長期食藥，每年驗身唔慳得喎。
體檢日喺北角蘇浙公學舉行，吸引逾四百名街坊參加，剛由四川考察返港嘅Miriam亦把握機會驗埋眼，田二少就除襪驗吓有冇骨質疏鬆症，佢話平日工作壓力大少做運動，兩年前做例行體檢先知心臟有一條細血管塞咗七成，拿拿聲通波仔。依家每星期堅持抽二至三日做二十分鐘競步運動，保持心肺功能健康。
講起立法會四川考察團，Miriam大讚當地嘅水煮魚辣味十足夠正宗，吸引最食得辣嘅立法會議員李國麟大快朵頤，眾人又品嘗四川水井坊名酒，Miriam話酒香撲鼻，好飲過國酒茅台添，可惜佢酒量一般，只係淺酌輕嘗，出名飲得嘅黃宜弘議員就飲到不亦樂乎。