香港無申辦奧運，不過彈丸之地有霍震霆呢個代表舉手投下神聖一票，都算香港之光。霍震霆唔單止有份決定一六年奧運舉辦地點，一四年冬季奧運會嘅舉辦城市，佢都有份決定，俄羅斯總理普京仲因為要爭辦冬奧，親自當面游說霍震霆。

傾足一粒鐘

霍震霆話，年前出席一四年冬奧會申辦城市表決大會時，有日突然收到自稱係普京嘅電話，對方用英語，話請佢到房間坐坐。究竟係咪普京來電，霍震霆半信半疑，佢最後仍禮貌地行去睇睇，誰知房門一打開，果然係普京！佢拉住霍震霆傾足一粒鐘，游說其支持俄羅斯黑海小城索契申辦冬奧會。霍震霆無講有否賣人情，不過俄羅斯最後的確贏咗。

至於一六年奧運，四個申辦城市包括美國芝加哥、日本東京、巴西里約熱內盧及西班牙馬德里連日來搏命拉票。美國總統奧巴馬及日本新任首相鳩山由紀夫齊齊賣花讚花香，西班牙國王卡洛斯同巴西總統盧拉都唔錫身，飛去哥本哈根親自拉票。

到底霍震霆會將神聖一票投畀邊個國家？佢摸摸頭皮笑騎騎話：「喺個肚度。」唔話你知。不過大熱門巴西就出埋口術，霍震霆皺晒眉話，巴西籍嘅國際足協前會長夏維蘭治四圍同人講，話霍震霆都支持巴西申奧，令佢好尷尬：「你知我做嘢好含蓄㗎喇，不過因為我爸爸（霍英東）曾經係國際足協嘅執委，同夏維蘭治好老友。」即係話，今次畀人擺上枱都唔敢出聲囉。

坐夜機投票

不過如果里約熱內盧勝出都不無道理，佢打正旗號要成為南美洲第一個奧運主辦城市，加上有政府財務保證及民眾力撐，暫時獲評價最高。

總之霍震霆十月一日晚橫掃北京各大活動及酒會後，即刻趕住坐凌晨兩點嘅飛機，坐十幾粒鐘長途機直奔哥本哈根開會場地，去到啱啱好夠鐘投票。丹麥同北京難免有時差，希望舟車勞頓嘅霍震霆，千祈唔好瞌眼瞓投錯票喇。