王廷歆呻返工要打卡

做過煲呔曾家廚嘅于燕平，上年返蘇州子承父業，轉型做近代歷史說書人，即係神州版黃子華，尋日講起小甜甜嘅生前故事，果然引人入勝。于燕平話，九○年初到香港，因得小甜甜賞識，喺華懋旗下新雪園做廚，有一次王廷歆同佢呻，話自己喺新雪園食飯無得簽帳，返工要打卡，唔打卡無錢收，搞到于半信半疑。不過，于燕平對呢位老爺唔錯，于話：「我識做呀，佢每日食飯廿蚊，我日日劏野生水魚，裙邊就燉畀佢食」，王廷歆連續食咗一個月，大讚好嘢，話「掂喎，食咗之後猛到不得了！」

小甜甜長居尖東華懋頂樓，于燕平亦都有古講，佢憶述有一次送飯畀小甜甜，「真係大開眼界」，上到去只見大班白領埋首工作，同尋常辦公室無異，但係當一位職員向佢問明來意之後，「都唔知佢喺邊度㩒咗個掣，然後就聽到隆、隆、隆，後面幅牆慢慢打開，聽到入面傳嚟卜、卜嘅木魚聲，當時龔如心喺度唸緊經。」

華懋頂樓既係寫字樓，又係小甜甜嘅「別宮」，于燕平當年上過去大開眼界。	小甜甜生前長年食素，未料到被于燕平打爛齋缽。	王廷歆食咗一個月于燕平為佢炮製嘅燉野生水魚裙邊，大讚：「掂喎！」

用火腿老雞湯煲飯

王德輝失蹤後，小甜甜長期食素為丈夫祈福，于燕平每日返工第一件事，就係為小甜甜整煲仔上海菜飯，用料指定用冬筍、香菇同小唐菜，唔准落肉，于覺得長期咁食，一定口都淡埋，於是自作主張「犯咗少少規」，用煮翅嘅火腿老雞湯當水煲飯，小甜甜第一日就食出有唔同，問經理係咪換咗廚？于燕平好自豪咁話，收過小甜甜三百蚊貼士，係華懋員工裏面收小甜甜貼士最多嘅人。

卓妮