教資會月前公布第四輪配對補助金計劃嘅撥款結果，嶺大籌款數字位列八大院校之尾，僅得二千八百萬元，雖然有教院陪佢包尾（同樣籌得二千八百萬元），但眼見有「籌款王」之稱嘅中大及港大，係咁意分別籌到七億二千七百萬及六億九千七百萬元，差距之大，輸足幾條街。

戰況咁慘烈，Bernard又點會甘心投降，近日聯同校長陳玉樹發動漁翁撒網式宣傳攻勢，廣邀「有米」嘅社會名人及商會參觀嶺大。日前Bernard就打正「潮州冷」旗號，邀請十幾位潮州商會高層人士，包括長實主席李嘉誠表弟兼永遠名譽會長莊學山、從事大米生意的唐學元、會長許學之、副會長兼嶺大校董周振基、副會長陳幼南等人，浩浩蕩蕩操去嶺大來個「半天遊」。

大吐苦水 肉緊推銷

Bernard先招待一眾潮州鄉里飲杯茶、食件蛋糕，閒話家常後就轉入正題，Bernard大吐苦水呻窮話，嶺大今年籌款金額「大墮後」，原因並非一班校董唔夠牙力，而係嶺大「先天不足」，畢業生少人一大截，加上該校人氣不足，畀外界標籤為「次級大學」，想敲人門攞錢都難。咁淒涼，真係聽到都令人眼濕濕，Bernard再加多兩錢肉緊推銷，話家族旗下嘅公司已帶頭請咗幾個嶺大畢業生，其中一位表現突出，一年內連升幾級又加薪，佢強調，加對方人工前唔知佢係嶺大生喎。

陳校長都配合Bernard嘅推銷攻勢，變身做導遊帶一眾嘉賓喺圖書館、運動場及飯堂打咗個白鴿轉，行足半粒鐘，接住請大家喺嶺大會所食晚飯，招呼周到。

唔會氣餒 目標一億

眾人食到近九點至散席，臨走前，我哋向潮州商會秘書長查詢，佢話暫時未有參觀嘉賓提出捐錢。Bernard對此並唔失望，佢坦言，最緊要畀人認識嶺大嘅獨特教學理念，畀人知你做緊乜，太快獅子開大口問人攞錢，只會惹人反感。近日樓股齊飛，Bernard話，善長手頭係鬆咗，但捐錢仍然係小心翼翼。

陳玉樹校長就話，籌款「包尾」唔會感到氣餒，正所謂少少苦楚等於激勵，佢哋籌款目標只係一億元，現時已籌到五千幾萬，用餘下幾個月籌埋另一半，唔係好難啫，希望各位善長仁翁，多多支持嶺大喎。