今次籌款晚宴原本講好只係分別捐錢畀兩個慈善機構，其中一筆係捐畀香港復康會幫四川地震兒童做康復，但最近媽打突然決定幫埋禁毒常務委員會籌款。卓妮好奇問媽打係咪將原本兩份錢分成三份，媽打聽到即時好大反應話︰「梗係唔係啦，點可以分薄原本兩個機構嘅善款㗎？係預算再籌多一百萬呀，所以先咁忙，不過依家搞掂晒啦！」

長俸捐晒畀慈善機構

媽打人面廣，籌款絕對難唔到佢，但最緊要都係佢身邊嘅好朋友夠善心，即使有善心，都要媽打有說服力至得，點至有說服力？媽打自爆現時每個月幾萬元長俸都捐晒畀不同慈善機構，仲笑稱：「就嚟無錢開飯喇！」正想添多碗媽打臘腸炒飯嘅卓妮都唔知添唔添飯好，但精靈嘅媽打跟住就話︰「不過做女人點都有啲租收吓嘅！」

講開受地震影響嘅四川小朋友，媽打話好開心見到啲小朋友復康進度良好，她準備同骨科名醫高永文下星期一齊去三兩日四川探望小朋友，分別會去幾個地方，咁行得，唔怪得之媽打對腳Keep得咁靚啦！

卓妮