功夫茶愈來愈覺得，香港雖然唔係沙漠，不過都出現咗非常神奇嘅海市蜃樓，疑幻似真，美麗絕倫，搞到一隻二隻迷途羔羊癡心妄想。港版海市蜃樓係咁嘅，財爺曾俊華話喎，捱過金融海嘯一年之後，香港經濟已經過咗最壞嘅時候，就好比「隧道盡頭見到曙光」！

見到曙光？係真唔係？不如咁講啦，如果唔係呃細路，鬍鬚曾一定係產生幻覺，因為根據專家所講，股市上揚同埋樓市暢旺所造成嘅小陽春只不過係假象，純粹係外圍流動資金帶動，經濟並未真正復甦。至於中小企嘅親身經驗咯喎，更加反映經營環境仍然惡劣，前景未明朗，舉步甚艱難。

呢嗱，就好似曾經帶頭上街表達訴求嘅「中小企救亡大聯盟」發言人陳勇前咁吖，佢係經營糧油食品批發嘅，表面上生意額逆市升咗兩成，實際上有苦自己知。乜嘢苦呢？陳先生透露，兩年前向銀行貸款九百萬，本來還款期係四年，金融海嘯之後銀行收緊信貸，逼佢一年之內還清。嘩！大佬，還款期四年變一年，好惡頂啫！冇錯，非常惡頂，陳勇前被迫減價促銷，又要賒借度日，家陣仲未知道可唔可以脫險。

大家試諗諗，即使係多咗生意嘅商家，經營已經咁困難，換轉係少咗生意嘅商家，情況會係點呢？不必多講喇啩，唔執笠都要吊鹽水。

咁就帶出另一個問題嘞，因乜事幹銀行要收緊信貸？原因好明顯，美國金融機構作為金融海嘯嘅罪魁禍首，當初就係亂咁借錢爆大鑊，卒之害人害己害地球，銀行家見過鬼怕黑，信貸梗係唔會咁鬆手啦。金融業元氣大傷，你話「隧道盡頭見到曙光」？死過翻生嘅銀行家可能會同你講，發夢冇咁早！

大家都知道，做生意一定要問銀行借錢，如果銀行唔肯借，一定冇運行。今時今日嘅實際環境就係，銀行一來自身難保，二來怕你冇錢還，所以信貸態度極之謹慎。商家一係借唔到錢，一係還款期短到極，咁又點可以叫做經濟復甦呀？

再睇得宏觀少少，二十國集團財長前一排開會，由中國、俄羅斯、巴西以及印度合稱嘅「金磚四國」發表聯合聲明警告，斷定危機已經結束言之尚早，全球經濟仍然存在重大風險。

即係咁，國際巨頭都話危機未過，曾俊華憑乜嘢話見到曙光？計功夫茶話齋，迷途嘅鬍鬚曾唔止見到海市蜃樓，直情見到鬼！