「五散人」之一嘅立法會資訊科技界代表譚偉豪（I.T.豪），今年不滿政府安排，無就施政報告同煲呔曾見面。尋日佢索性透過同傳媒茶敍講吓佢嘅睇法。I.T.豪心目中對六大產業滿腦子大計，提出「山寨式開放創新」，由香港幫內地嘅煙盒手機、驗鈔手機攞專利，推銷到海外市場。聽落去似係幫電影《國產凌凌漆》入面嘅特工裝備平民化喎！
原來I.T.豪睇咗一本叫做《山寨來了》嘅書，認為內地以平價同抄襲致勝嘅文化有得做。佢舉例iPhone成功後，內地都出咗類似嘅手機，而且銷情唔錯，呢件事令佢諗起內地一部外表似國產熊貓牌煙盒、其實係一部電話嘅科技產品，佢話須知內地煙民多，既係煙盒又係電話，十分方便內地同胞；I.T.豪仲有一部兼備驗鈔功能嘅手機，可以打電話之餘，更可驗埋銀紙添，可見內地好多手提電話都好有創意。
根據I.T.豪嘅構思，香港可以幫呢類充滿創意嘅手機攞版權、做外形設計同檢測認證，再利用港人擅長嘅市場推廣，將呢類手機推向國際。估唔到I.T.豪都幾有諗頭。