考察團早前舉行內部會議商討行程細節時，旅遊界議員謝偉俊提議大家轉坐經濟客位，希望幫納稅人慳番啲公帑，但就反過來畀人質疑佢搞搞震博出位。各黨派之前為今次八個公費外訪名額爭到頭崩額裂，但抽籤贏咗有得免費歐遊嘅體育界霍震霆，到臨出發前又話要遲到早退，令其他團友同抽籤輸咗嘅議員非常火滾，質疑佢唔應該霸住個位！

搞成粒鐘先再上機

考察團喺香港時間前晚正式出發，喺當地尋日清早飛抵德國慕尼黑，準備尋日上午再轉飛捷克布拉格展開首站行程，點知立即又爆出笑話。我哋收到風，堅持坐經濟客位嘅謝偉俊準時上咗機，但三名坐商務客位嘅議員梁家傑、陳茂波、葉國謙同兩名立法會秘書處職員，就懷疑因為掛住享受商務候機室嘅美酒佳餚同休息設施趕唔切登機，被迫滯留慕尼黑機場，最後搞咗成粒鐘先至搵到另一班機，仲要自掏腰包補錢買機票，名副其實係貪字得個貧。

差啲變成國際笑話

我哋越洋訪問咗其中一位失魂團友，佢強調佢哋聽到登機公布後，已立即拖行李走人，但冇預到個機場原來咁大，趕到登機口時班機已經離咗地，但就否認因大吃大喝或瞓過龍而轉唔切機。好在同樣坐商務位另外三位團友，早兩日已經飛抵當地籌備訪問工作，加上三名團友只係遲咗個零鐘頭，冇影響整體行程同各項官方訪問安排，否則事件分分鐘會變成國際笑話。至於係咪要自掏荷包補錢，佢就唔肯講喇，只係話冇用到公帑，真係「啞子食黃連，有苦自己知」。

考察團今次訪問東歐三國，主要係想了解當地嘅政治制度同政改經驗，包括今日同捷克國會嘅憲制及法律事務委員會會面，點知當地喺考察團抵達前咁啱爆發憲制危機，政府決定解散國會提早舉行大選，但又畀憲制法庭裁定違憲，政局亂過亂世佳人，令今次會面被迫取消，改為與前國會議員非正式食飯交流。團長劉慧卿就發揮阿Ｑ精神，話香港政界早前都討論過解散立法會問題，今次可以順道考察吓當地嘅實戰經驗，除笨有精喎。