唔會啩，大家可能會話，政府官僚平日雖然懶懶閒閒，有時麻麻煩煩，但係應該都未至於野野蠻蠻，唔通真係想官逼民反？係咪想官逼民反就唔知，功夫茶淨係知道，運輸署批出嘅「禁區紙」荒謬絕倫。

呢嗱，係咁嘅，九月一日開學嘞，接送學生去新界北禁區返學嘅保母車司機，要到九月二日先至收到禁區紙。運輸署係咪懵到上心口，連邊一日開學都唔知？咁都未算最懵，更加離奇嘅係，運輸署大概連學校幾點鐘返學放學都唔知！

以上水清城路嘅曾梅千禧學校為例，返學時間係上晝七點五十五分，放學時間係下晝三點十分。好嘞，你估運輸署批畀保母車容許上落客嘅時間又係點呢？禁區紙列明，接送學童嘅時間係上晝八點至九點，以及下晝五點至五點半。

大家嚟計一計數，假如保母車司機「依法辦事」，學生哥返學係咪迫於無奈日日集體遲到？放學之後係咪百無聊賴，癡癡地等粒幾兩粒鐘先至可以返屋企？假如司機心腸好，唔想同學仔細細個就變咗遲到大王，又唔想佢哋無端白事罰留堂，唯一嘅辦法就係明知故犯，違例駕駛，硬闖禁區！

你話嘞，混帳嘅運輸署係咪唔准同學仔準時返學放學吖？

記者親眼見過一單畸屎，一架保母車上晝七點半駛入禁區，學生哥落晒車之後，交通警員上前檢查，由於容許上落嘅時間列明係八點至九點吖嘛，司機即係違例囉，差人叔叔準備抄牌，盛惠罰款四百五十大元。保母車司機於是就求情嘞，講出運輸署嘅荒謬安排，解釋自己係被迫犯法。就喺呢個時候，奇迹出現，阿彌陀佛，交通警員打消咗抄牌嘅念頭。計功夫茶話齋，執法人員有時都幾通情達理嘅，尤其係當佢哋都一頭霧水，唔知運輸署搞邊科嘅時候。

係囉，運輸署到底搞邊科呢？點解會喺禁區紙列出莫名其妙嘅「迷幻時段」？而且點解會喺開咗學之後先至批出禁區紙？都係嗰句啦，如果唔係戇居，一定就係玩嘢，而且係瘋狂咁樣玩嘢，玩到大人細路都揩嘢，一係司機違例揩嘢，一係學生遲到揩嘢。

講到呢度，功夫茶要向保母車司機致敬，佢哋為咗維護學生應有福祉，不惜硬闖禁區管接管送。功夫茶又要向交通警員致敬，佢哋唔想助紂為虐玩殘市民，不惜有法不依放過司機。

唉，好心運輸署官僚擘大雙眼做人啦，嗰個「迷幻時段」明顯只適用於一般朝九晚五辦公室，點可以瞇埋眼亂咁套用於學校㗎？係咪想逼到學生哥都上街示威呢？如果係咁，保母車司機呀，唔該禮賓府有落！