但事件唔少謎團未解，例如點解邱達昌咁失策？邱達昌尋日出席一個圖片展時，親自重組案發內情，原來佢今次係為幫朋友而中招。

幫朋友搞中港車牌中招

邱達昌係遠東發展副主席，竟要搵人幫手攞中港車牌，真相終於揭盅。邱達昌解釋，其實佢一早擁有中港車牌，但係有朋友無又想搞番個，於是咪拔刀相助囉，點知遇上騙徒，佢尋日提起呢件事仍語帶無奈：「發生咗，無辦法啦！」睇嚟佢自己都覺得有少少老貓燒鬚！

方黃吉雯話撲水無難度

主力為內地貧民醫治眼疾嘅「健康快車」創會主席方黃吉雯，尋日着住一襲鮮橙色套裝出席圖片展，相當搶眼。

佢話，金融海嘯令到香港人身家大縮水，但係無捲走埋港人嘅愛心，健康快車嘅募捐無受影響，揼人心口同以前一樣咁得心應手。

其他算住荷包捱日子嘅慈善團體，不妨向小吉請教一下逆境「吸財」之道吖。