唔知係咪當局有見及此，一於搞搞新意思，唔使增加資源，就可以有全新嘅救護服務，而且比傳統嘅白車更有效率添。呢嗱，油麻地日前發生嚴重車禍，一名女子頭部重創等待救援，有部十四個轆嘅新型號白車話咁快趕到現場救人，冇死火冇行錯路，將傷者極速送去廣華醫院急症室救治。

查實天下間邊有一部咁巴閉嘅白車吖，呢部只不過係七名消防員同埋救護員迫不得已之下組成嘅「人肉救護車」。原來當時西九龍九個救護站同消防局冇車可以調用，電腦調派系統竟然由港島西區以及東九龍調車去油麻地救人。唉，等得嚟蚊都瞓啦！

在場救護人員左等右等都等唔到白車，好彩現場距離廣華醫院唔遠，喺救人心切之下，消防員集七人之力充當人肉救護車，沿窩打老道行人路抬住傷者急行四百公尺，行到氣來氣喘，成頭大汗，終於將傷者送到醫院。

消防處救護員會副主席屈奇安表示，呢種情況以前絕少發生。梗係少喇，香港自稱係乜嘢亞洲國際都會，依家居然淪落到要靠人肉救護車救人，講起嚟都笑死人喇！

其實係人都知問題嘅癥結係白車不足兼夾太過老爺。以今次事件為例吖，由於事發時嘅更分，正正係唔夠車用嘅高風險時間，白車比日更少咗一半。再加上依家編制只係得一百一十四架白車當值，本來已經比英國顧問提出嘅一百三十三架少，最大劑嘅係，實際運作嘅白車，竟然再打折扣得番九十幾架。十個茶壺七個蓋，難怪要人肉救護車頂硬上啦！

話時話，白車不足呢個問題都唔係一日半日至出現，已經存在咁多年，當局一直闊佬懶理，唔單止唔肯正視問題，冇增撥多啲資源加強白車服務，反而度咗條救護車調派分級制屎橋出嚟。喺呢個所謂分級制下，病人打電話求救，既要回答一大堆問題，又要憑住控制室人員隔空斷症去決定邊個係危急，有冇再兒戲啲吖？分明就係攞人命嚟較飛！

喂！白車服務救死扶傷，即使再增加多啲資源落去，市民都唔會Say No㗎，點解當局硬係咁孤寒呢？不過冇計啦，港府向來都係視人命如草芥，請副局長同政治助理或者加公務員人工，諗都唔使諗，幾多錢都肯使，之但係換老爺白車就一味拖得就拖，你死你事。

老實講吖，如果炒晒班廢柴副局長同埋政治助理，每年慳番幾千萬，將啲錢用嚟買白車，又點需要搞到要用人肉救護車救人吖！試吓叫班高官坐呢啲甩皮甩骨嘅白車，睇佢哋驚唔驚！