港大呢排都唔知行緊咩衰運，一日之內爆幾單醜聞，連校長徐立之都大嘆唔好彩。尋日喺中環遇到港大校友梁智鴻醫生，話晒都係母校，感情深厚係必然嘅事，所以對於呢幾隻「鑊」，明明事不關己嘅金刀梁都無落井下石，佢氣定神閒咁話︰「港大係香港第一間大學，依家有咁多學生讀緊，又有咁多人畢業出嚟做事，可能有良莠不齊啦！」咁又係，樹大有枯枝，更何妨係棵「百年老樹」，用「良莠不齊」呢個成語，睇嚟金刀梁希望外界唔好一竹篙打一船人。
講到師弟林兆鑫貪出禍，金刀梁覺得未嘗唔係反面教材，事關每件唔好嘅事都會有好嘅一面，佢讚林係一個人才，相信對方出番嚟之後，會繼續對醫學有貢獻。佢仲話同林兆鑫識咗好耐，大家差五屆畢業，又一齊共事過，林嘅辦公室仲喺自己附近添，完全無同對方劃清界線「扮唔識」，認真有義氣！
送完炭畀雪中嘅林兆鑫，金刀梁又為港大校長徐立之抱不平。佢覺得徐校長本身做科研好成功，依家要做埋行政同教育，有啲嘥咗對方。之前有人話徐校長金錢掛帥，金刀梁就解畫話︰「以前香港得一間大學，政府放好多資源落去培育人才，但依家就唔同晒，好多嘢都開放咗，多咗院校競爭，所以都好困難。」
撐完學弟再撐校長嘅金刀梁，對母校可謂有情有義。