嗱，就咁，月薪二十萬，應徵者唔需要乜嘢特別才能，擁有十五年公共行政經驗就得㗎嘞。大家可能會問，薪水高成咁，拍得住啱啱宣布提早退休嘅終審法院首席法官李國能，起碼都要大學畢業啩？就係咁先至叫做筍吖嘛，招聘條件淨係話「具良好教育水平」，冇話過要大學畢業。你知啦，乜嘢叫做良好係非常抽象嘅，中學畢業又係良好，小學畢業都係良好，只要唔係文盲，讀過扑扑齋亦算係良好教育水平。

有興趣哩？流口水哩？功夫茶講嘅呢份超級筍工，就係平等機會委員會主席嘞。由九月三日起，政府就平機會主席一職進行公開招聘，喺報章刊登招聘廣告。吖，幾乎講漏另一項入職條件，應徵者要有香港身份證，不過冇話唔准擁有雙重國籍，功夫茶唔敢肯定「心繫加國」嘅副局長風波會唔會歷史重演。

報名要快，九月二十四日截止申請㗎喇，如果你想做平機會主席，一定要好好把握呢個唔知算唔算平等嘅機會。大家可能又會問，平機會打正旗號鼓吹平等機會，招聘主席冇可能其身不正玩偏私啩？大家有所不知，平機會主席名義上由一個遴選委員會建議最適合人選，實際上最終由行政長官委任。大家睇番委任金管局新總裁陳德霖吖，過程荒謬絕倫，所謂候選者居然唔知自己已經被列入遴選名單，由始至終淨係知道曾蔭權老友記、當時嘅特首辦主任陳德霖一支公被遴選，結果又真係呢位大內總管陳公公大熱當選。換言之，委任十居其九用人唯親，所以大家對於招聘平機會主席嘅平等機會都係打定輸數好啲。

平機會之所以提供超級筍工職位空缺，原因當然係現任主席鄧爾邦做得太差啦，明年一月十一日任期屆滿，眾望所歸，冇得留低。鄧爾邦做得有幾差，唔使多介紹喇啩，審計署又猛烈批評過，立法會又極度遺憾過，總而言之就係行政混亂無王管，浪費公帑大花筒，鄧爾邦唔使即刻推出午門斬首已經偷笑咯。

好嘞，講番超級筍工，薪高糧準福利好，到底有乜嘢做嘅呢？對於呢個問題，斷估冇乜邊個答得出，因為真係唔知有乜嘢做，淨係知道歷任主席一係就離開辦公室搭飛機遊埠，一係就留喺辦公室籠裏雞作反。呢嗱，正經事真係唔多覺有做㗎，香港人權組織冇耐之前先至批評，平機會冇派人出席聯合國消除種族歧視委員會會議，冇履行宣傳禁止種族歧視嘅責任。委員馮檢基講得滑稽，佢話平機會從來冇討論過要唔要派人出席聯合國會議。重要會議唔出席，無聊公幹仆到去，正係平機會本色！

所以話啫，呢份確係超級筍工，新任主席即使唔學鄧爾邦咁樣假公濟私，每個月齋出糧已經係浪費公帑。