撈埋勞工界一齊諮詢

煲呔曾陸續見完專業議會、經濟動力等政團，得番三名議員嘅自由黨無得單獨見煲呔曾已經無乜面，點知仲要畀煲呔曾踩多腳。煲呔曾訂出嘅三個日子，自由黨主席劉健儀只係得一日喺香港，即係等於無得揀；偏偏同一日報咗名參加諮詢會嘅議員仲有李卓人、張國柱、梁耀忠同馮檢基等幾個勞工背景代表，好似要將水同油撈埋一齊嚟諮詢，搞到個個都無癮！

煲呔曾應該都知搞出個大頭佛，打算喺諮詢會後拿拿臨約番班自由黨去禮賓府食飯，希望補吓鑊。不過問題核心係佢嘅規定僵化無聊，如果佢唔取消呢條不成文規定，多多鑊都唔夠佢補啦！

特首辦回應話，經濟動力同專業會議有向立法會秘書處「註冊」，係一個組合，但政府問過秘書處，「五散人」就無，所以要跟番江湖規矩嚟做。