尖沙咀天星碼頭巴士總站搬遷到尖東港鐵站上蓋嘅計劃，引起一眾巴士迷及民間團體反對，運輸及房屋局局長鄭汝樺（Eva）當年出任旅遊事務專員時，講過遊人可以好舒服由尖東沿海旁行去天星碼頭，點知呢番說話被尖碼之聲團體連番狙擊。Eva尋日用購自日本嘅私伙信紙，親自寫信向有關團體澄清自己嘅說話原意。
Eva在信中再次澄清，她當日並非叫所有人都由尖東新巴士總站行去天星碼頭，只係針對旅客，可以好舒服咁沿海濱長廊及星光大道到天星碼頭乘小輪渡海，欣賞維港美景，市民亦可於碼頭迴旋處繼續上落。Eva已經卸任旅遊事務專員，其實有意見認為佢唔應該再插手此事，但據聞Eva覺得應該為自己講過嘅說話澄清吓，所以親自寫信回覆。
可惜尖碼之聲代表無受Eva親自回信而感動，堅持要求Eva出尖沙咀海旁行一趟，實地進行「好舒服」測試，仲話Eva唔係街市賣菜阿嬸，講過嘅說話要負責喎。Eva早排被元朗菜園村代表邀請落村飲杯百花蛇舌草，唔知佢有冇時間去尖沙咀海旁行一趟呢？