啱啱轉到新崗位嘅馮程淑儀（Betty），尋日首次以康樂及文化事務署署長身份同傳媒見面。放咗一個悠長假期，Betty精神奕奕返新工，佢話調新職最開心嘅一定係佢囡囡，依家每朝早返工前都可以順路送囡囡返學，囡囡再唔係唯一無媽咪送返學嘅小朋友；當然，身為生產力促進局總裁嘅老公馮永業喺歧視工會官司中脫罪，對Betty嚟講更係錦上添花。
民政事務局尋日破天荒喺海防博物館搞咗個酒會，介紹該局轄下兩個部門新署長，除咗Betty，仲有新聞處處長黃偉綸（Michael）。Betty話原本以為離開咗「7‧11」嘅新聞處後，可以多啲時間湊女，豈料員工抗議要檢控埋違例吸煙而上街遊行，搞到佢連日忙於救火，東亞運動會更加係未來幾個月重中之重嘅工作，好有挑戰性不在話下，搞得唔好隨時揹鑊。
不過，Betty依家每朝七點四十五分才出門口，趕得及送女返學，兩母女多咗一段親子時間，所以最開心一定係囡囡！
至於喺同僚眼中被視為搏殺型嘅Michael，一上任做新聞處處長就遇上終審法院首席法官李國能突然提早離任，連日來都忙於作部署，甫上任就已領教到「7‧11」嘅滋味。不過對於水務署被指截甘威胡，Michael就話唔係佢教路。梗係啦，件事處理得咁差，如果係佢教路，就真係差勁喇！