盡快對港人加強國情教育，從來都係特區政府嘅定期功課，其中公務員系統更加係重要一環，象徵意義極大。不過，政務官（AO）雖然話係港府嘅中堅隊伍，但係佢哋對國情有幾多認識，大家有目共睹，「煲冬瓜」普遍水平更多令人不忍卒睹，不時弄出笑話，呢種情況同香港回歸十三年嘅政治形勢完全脫節。公務員急須惡補國情教育，已經係不爭事實，而港澳公務員培訓中心嘅誕生，正好反映呢種情況。

擬建嘅港澳公務員培訓中心，位於國家行政學院嘅北面，有學院管理層向最近上去讀國情「雞精班」嘅香港社團核心透露，財政部已經批咗款，不過，不足以支持整個項目嘅經費，相當部分要揼港澳大孖沙心口籌番嚟。邊個大孖沙咁疏爽呢？學院管理層無透露，不過，對香港公務員加強國情教育，呢項回歸工程意義重大，相信只要北京方面開到聲，都無乜邊個會拒絕。

課程包括內地憲法經濟

其實，九七回歸不久，特區政府已經送首長級公務員上京讀國情研習班，初時靠清華大學開班，近年將之規範化，轉移陣地到內地專責培訓高幹嘅最高學府國家行政學院，課程內容有中國綜合國力、內地法制、憲法與香港《基本法》同內地嘅宏觀經濟情況等等。根據由俞宗怡做局長嘅公務員事務局資料，過去兩年，參加行政學院課程嘅公務員每年約四十人左右。

最近去上過堂嘅政界人士話，學院另建新大樓，雄心勃勃開設港澳公務員培訓中心，反映中央同港府已經將提升公務員國情教育定為長遠工作，未來勢大刀闊斧推行，好似以前港英殖民地時代保送高級公務員去英國進修一樣，日後香港班AO邊個未檻過港澳公務員培訓中心嘅門檻，睇怕前途好極有限。