本文重點
「扮嘢始祖」藝員盧海鵬最近再度掀起扮嘢熱潮，佢喺一個電視節目中飾演「教肉局局長孫明洋」，模仿教育局局長孫明揚相當神似，就連講嘢嗰種慢條斯理神態都學到十足十。卓妮尋日喺一個場合遇到真正嘅孫公，當然第一時間問吓對於鵬哥扮佢有乜感覺啦，結果答案出乎意料，孫公竟然擔心老婆鍾小芬認錯咗個Ａ貨老公。
扮葉劉要歪嘴黐脷筋
孫公話曾經睇過一集，佢劈頭就話：「咪『六四二十四』嗰集囉！」未睇過可能唔知佢講緊邊集，故事係講Ａ貨孫公開記招，有記者問及有關六四問題，Ａ貨孫公就氣若遊絲回應：「六四二十四，今日已經六月七日，你咁遲先至問，出年再問過啦！」鵬哥不但學足孫公老油條表現，仲學埋高官答問題慣性耍太極嘅伎倆。
問孫公覺得鵬哥扮得佢似唔似？孫公話無乜意見，扮得似係可能因為年紀大嘅問題，可能因為扮得太似，佢話最緊要係佢老婆唔好認錯盧海鵬做老公就得嘞，認錯咗Ａ貨老公就唔係幾好啦！乜唔係最緊要孫仔唔好認錯外公咩？孫公一聽到「孫仔」兩個字，即時笑逐顏開。
有孫公身邊嘅人話，孫公臉形方啲，鵬哥臉形就圓啲，但鵬哥接受訪問時講過，扮嘢秘訣最重要係搵人物嘅小動作，然後將小動作誇大，個性愈明顯嘅人就愈容易扮，仲話孫公嘅特質就係雙目無神，講嘢把聲好似畀人打緊咁；而扮葉劉淑儀就要歪嘴，少少黐脷筋，原來扮嘢係有咁多學問嘅！
卓妮