本文重點
最近因黨籍問題引起爭議嘅疑似特首候選人、行政會議召集人梁振英（CY），沉寂一陣子後尋日又曝光，帶埋老婆同囡囡齊齊參觀孫中山紀念館，咁啱又畀卓妮撞個正着。CY話自己喺荷李活道小學讀書，當時老師講過孫中山先生嘅革命事迹，令佢印象深刻，仲話自己好受孫中山先生影響添。
孫中山紀念館今日起舉辦中山陵展覽，尋日搞咗個開幕禮，喺芸芸嘉賓中，竟然畀卓妮發現CY同太太、囡囡嘅影子，CY唔係主禮嘉賓、康樂及文化事務署事前都無話行會嘅人會出席，CY當然唔係不請自來，而係康文署請晒行會同立法會議員，只係CY畀足面，帶埋屋企人嚟捧場。
兩父女成個餅印
CY囡囡好少出席公開場合，但同爸爸成個餅印，個鼻尤其似足CY，佢尋日薄施脂粉，紮起馬尾，留心聽講解，成個乖乖女。CY話好多時都有同屋企人行博物館，佢自己細個讀荷李活道小學，老師都有講及孫中山先生喺學校周圍嘅革命事迹；佢仲話行會花咗好多心思同氣力，先搵到甘棠第做孫中山紀念館添。不過，一提起康文署早前被本報踢爆遺失一批孫中山文物，CY今次懂得封口，話佢哋會處理好喎。
卓妮