不過唔使怕，好彩有一個英明神武嘅特區政府喺度，佢哋為咗減輕家長嘅經濟負擔，又為咗減輕學生哥嘅書包重量負擔，去年十月中旬成立「課本及電子學習資源發展專責小組」，由教育局副局長陳維安擔大旗，討論電子教科書嘅可行性，真係功德無量呀！

好嘞，呢個小組經過一年討論，召開過八次會議，原本建議於二○一○年九月起喺部分小學推行先導計劃，試行電子書，但小組至今仍然未落實具體細節安排。

咁即係點呀？仲使講到明咩，咪即係呢個電子課本計劃勢將爛尾，好快就壽終正寢囉！

原來專責小組愈討論愈覺得唔對路，開始發現學童手提電腦硬件投資費用勁貴，教科書軟件開發成本又超高，先知道原來電子書可行性好低。依家搞到一鑊泡收唔到科，又成為「教育八萬五」，家長繼續要買貴書，班高官當然闊佬懶理啦。

唉，其實使鬼用一年時間至知道行唔通咩？用腦諗吓都知啦，如果電子課本咁簡單，人哋先進國家老早全面用緊啦！其實當局根本冇誠意推廣電子課本，話二○一○年試行，只不過係為咗平息教科書年年加價嘅民怨。

講到底，一日都係政府唔肯增撥款項畀學校購買教材，據教育界人士講，學校唔係話唔想支持呢個大計呀，但要為每名學生買手提電腦，最少要三百萬元開支，而學校逾七成經費有指定用途，好難額外調撥經費購買教材。

喂，政府又唔係冇錢，只不過係一毛不拔、目光短淺，唔想投放資源喺教育上面之嘛！咁唔通要學校左減右減開支，再減少學生活動，慳慳埋埋用嚟買教材咩？

話時話，如果針對教科書太貴呢個問題，電子課本其實唔係唯一嘅解決辦法，唔使一下子去到咁盡，非要急就章用電子課本不可啩？

冇辦法啦，呢個政府不嬲都係講就天下無敵，做就冇心冇力㗎啦，而且唔知點解，好似特別鍾意攞莘莘學子做實驗品。呢嗱，睇吓家陣教育制度吖，一年一小改，兩年一大改。以教學語言為例，先嚟個母語教學，再整個上落車機制，嫌唔夠煩，仲要搞多個微調方案，五時花六時變，令人無所適從。

不過計功夫茶話齋，呢個電子課本計劃爛尾，都未必係壞事。因為如果今次搞得成，出年又唔知會諗啲乜嘢出嚟要學生哥做白老鼠！