政府有好多工作都涉及跨部門合作，我哋尋日就喺金鐘一間五星酒店中菜廳，撞到三位來自不同政策局及部門女高官喺度同枱密斟，佢哋分別係返中環美利大廈嘅商務及經濟發展局局長劉吳惠蘭（Rita）、來自灣仔稅務大樓嘅環境局常秘兼環保署署長王倩儀、以及喺北角渣華道返工嘅地政總署署長譚贛蘭，莫非政府嚟緊有牽涉該三大政策範疇嘅措施推出，所以三位女高官要坐埋共商對策？
非也，Rita話只係朋友敍吓舊，唔係有乜特別嘢傾。睇番三人嘅履歷，原來佢哋都係七十年代後期入職做AO（政務職系），其中Rita○二至○四年做過環境運輸及工務局常秘，算係王倩儀嘅上上手，Rita去年底同幾位高官同事搞聯合書法展，王倩儀亦有去捧場，感情睇嚟相當唔錯。譚贛蘭未升任地政署長前，係前房屋及規劃地政局副秘，當時Rita係常秘，大家一齊幫時任房屋及規劃地政局局長孫明揚，譚贛蘭直情係Rita下屬。Rita雖然榮升問責局長，但都趁暑假得閒啲，同班姊妹敍吓舊，都相當難得。
其實Rita除咗係太極高手，平時仲有習書法，不過佢話書法老師高雲州去年中風，書法班就停咗，佢之前個個星期都會勤力習字交功課，依家冇咗老師喺課堂上督促指導，難免冇咁勤力，擔心書法功力會退步添。好彩Rita仲有另一個減壓方法，就係學咗十幾年嘅吳家太極拳，佢依家不論幾忙幾多嘢做好，每日都會花二十分鐘耍太極，每次都會打晒一百零八式先收手，絕不偷工減料。佢話耍太極要耍得好，記緊心神合一，切忌貪快，愈耍愈急就適得其反，果然有心得！