前經濟發展及勞工局局長葉澍堃（Stephen）百足咁多爪，退休後生活仲多姿多采過做官嗰陣，又幫前財爺梁錦松搞嘅小母牛籌款，又加盟另一前高官王英偉成立嘅創投公司做非執行董事，閒來學吓烹飪、寫吓食經，就連電視嘅美食節目都做埋。我哋八到，Stephen又有新動向，最近畀本港一間大型會計師事務所聘請為顧問，搵佢做生招牌，為公司嘅發展策略出謀獻策，協助推廣企業社會責任，對佢嚟講完全冇難度！
我哋尋日撞到Stephen，佢同我哋證實確有其事。原來Stephen早前幫小母牛籌款時，向呢個會計師事務所揼過心口，又搵佢哋派人參與籌款活動，大家因此而結緣；咁啱呢間會計師事務所最近想做多啲社區服務，體現企業社會責任，提升公司形象，於是想搵佢幫手。Stephen話，大家理念相近，份工又好有意義，加上工作好有彈性，啱晒佢咁忙嘅人，所以諗咗冇耐就答應咗。
Stephen話，雖然呢份係受薪工作，但佢晨早已過咗問責局長退休後再就職嘅一年冷河期，毋須政府審批，就算要批都唔驚，因為佢做嘅又唔係地產、又唔係旅遊航運、亦唔係電力公司，同佢舊職位完全冇利益衝突，認真係無有怕！