灣仔告士打道尋日爆水管，造成大塞車，影響嘅點止一般打工仔！就連中華廠商聯合會會長尹德勝都要焗住走去逼港鐵，佢喺人群之中被人半推半挾咁行入車廂，一問之下，原來尹會長約咗新任工業貿易署署長關錫寧喺中環食飯，廠商會秘書處通知佢，中環大塞車，搭港鐵最穩陣。
尹德勝生意路數多，好似出品動物衫同搞工業器材入口咁，喺北角同柴灣都有寫字樓，廠商會會址喺中環，平時有私人司機載佢三邊走，車來車往，尚算方便。尋日情況就唔同，灣仔爆水管，中環大塞車，尹德勝有車無用武之地，惟有嘥啲腳骨力，同啲打工仔一齊逼地鐵。不過，佢一入車就搵到位坐，唔使「Un」足全程。
尹德勝中午十二點四十八分搭上北角往上環方向列車，佢約咗關錫寧一點鐘喺中環見面，時間相當緊迫，所以面部表情亦有啲掹緊。列車駛到中環站，十二點五十七分，嘩！尹會長如果想唔遲到，睇嚟要跑九秒九至得囉。尹會長話，工貿署係廠商會嘅對口部門，關錫寧新官上任，所以佢同廠商會高層好似施榮懷同李秀恆咁，自然要請食飯啦，希望雙方以後保持緊密溝通嘛。