眾多議員當中，民協馮檢基同資訊科技界代表譚偉豪嘅公子都係升中三，讀嘅都係直資學校，兩位爸爸尋日都話已經買齊書，唔使好似其他家長咁周圍撲。保險界嘅陳健波就話，細仔讀國際學校，九月中先開學，根本未使擔心住。不過，原來佢哋從來都唔使撲書，因為直資同國際學校嘅學費雖然比一般津中同官中貴，但勝在服務周到，會幫學生買埋書，返到學校就有新書用。

公文袋梁家傑一對孖仔今年升中四，成為新高中學制嘅白老鼠，去到開學前仲喺度撲書，但袋巾傑話佢哋咁大個仔，乜都可以自己搞掂，唔使擔心。一班公子富貴又生性，唔怪得幾位議員都咁輕鬆啦！