香港婦協嘅「十‧一」會展騷早前曲終人散，多位名太瞓身粉墨登場，睇番當晚最大陣仗嘅表演，原來仲有好多趣聞，其中打大鼓環節，十二位名太在台上一字排開齊齊打鼓，場面十分壯觀！蔣麗芸（Ann）就爆料話，唔少阿太緊張到飯都無食，勒緊肚皮表演。
范太綵排爆蝦碌
有份演出嘅全國人大常委范徐麗泰，講起當晚演出仍然雀躍萬分。佢話咪睇各人棍起棍落，節奏感十足，原來事前大家根本唔識打鼓，婦協即時提供七堂促成班，畀大家惡補，每堂兩小時，但范太因為公務繁忙，最終只上到三堂，好彩佢領悟力高，上唔足堂都學識晒所有動作，上台一刻表現全無失手。睇佢一邊打鼓，一邊吶喊助威，就知道佢幾咁投入啦！
不過練習過程中都有啲小插曲。范太話，老師要求佢哋做十種動作，包括打完自己個鼓再打側面隊友鼓，可惜綵排時「蝦碌」百出，頻頻同隔籬嘅基本法委員會副主任梁愛詩互相撞棍，相當搞笑。今次打鼓其中一個環節，係要轉鼓、跳到右邊另一個鼓打，要十二個人打得齊，難度都好高，不過范太話，呢個反而冇難倒佢。
Ann蔣反串梁山伯
有份打鼓嘅全國政協委員蔣麗芸（Ann）都話，估唔到大家打起鼓嚟棍棍有力，氣勢不遜於男士，但原來當晚各人心情緊張，即使大會預備咗豐富晚宴，都冇乜點食。梗係喇，阿Ann打完鼓後急急返回後台換上大戲裝，反串演出梁山伯，獻唱一曲黃梅調《梁山伯與祝英台》，女扮男裝，認真係一大嘗試。
玩具大王蔡志明太太蔡李惠莉亦與千金蔡加敏、蔡加怡大展歌喉，唱出奇異恩典《Amazing Grace》，同台仲有邱德根新抱邱吳惠平及邊陳之娟，蔡太係虔誠基督徒，唱聖詩當然無難度，蔡太仲自掏腰包為自己及兩位囡囡度身訂造「登台」嘅華麗晚裝，款式襯晒一套，以示一家人一條心。
卓妮