孫公休假三個星期，期間去咗韓國首爾狂歡四天，同行仲有孫太鍾小芬及孫太嘅閨中密友，尋日孫公第一日返工，中午約埋孫太去香港會撐枱腳。八月嘅首爾，天氣宜人，但孫公此行似乎背負秘密任務在身，無暇細賞。孫太尋日爆料話，孫公喺首爾日日食完早餐就話返房休息，下午同夜晚都係一樣，四日來幾乎未離開過酒店半步，激到孫太紮紮跳，而孫公嘅理由係：要睇文件。外人一聽，就知事有蹺蹊！

孫公山長水遠去到首爾，竟然冷落嬌妻，自己匿埋喺酒店，如果換轉時下中學生有咁嘅行徑，肯定被學校拉去驗尿驗頭髮。原來，孫公首爾閉關，係要執行「標殺令」！孫公自爆，平時公務繁重，根本無暇處理如雪片湧至嘅信用卡等月結單，空有殺校大權，面對堆積如山嘅帳單，卻無「Kill Bill（帳單）」之力，所以難得離開香港，擺脫公務纏擾，一於匿埋全程Kill Bill，不論係已過期定係未到期嘅月結單，總之多啲嚟，密啲Kill，加上喺酒店唔受人干擾，Kill Bill，絕無撻Ｑ！

畀成80分陳維安

孫公Kill Bill成癮，香港中學則被毒禍入侵，港府年底落實校園驗毒計劃，遭受輿論狂轟，四面受敵，孫公呢個時候出山，睇怕都要繼續拆彈。問佢點樣評價喺佢休假期間、為佢披甲上陣推銷校園驗毒計劃嘅陳維安？值唔值六十分呀？孫公就讚口不絕話：「唔止！我畀佢八十分。」孫公過去三個星期休假期間，陳維安署任教育局局長，無形中幫孫公擋晒啲箭，險成炮灰，不過有局長呢句話，乜都值啦！

孫公執掌教育局，一係風平浪靜，十年唔見報；一係就炸彈連環爆，令人應接不暇，除咗校園毒禍問題，當局推行電子教科書，一樣遭受非議，被批評會睇壞細路哥隻眼。孫公解畫，話以後未必所有科目嘅課本，都會採用電子書形式，主要涉及互動教學嘅科目，先至會咁做，叫老師同學生都要適應喎。