遠嘅醫療失誤唔講嘞，淨係近排已經接二連三出現嚇人事件。首先，旺角發生亡命小巴大車禍，「依例驚嚇醫院」對傷者家人話喎，你哋畀錢先吖，唔畀錢冇得止血o架，嚇到你猋冷汗。然後，呢間醫院又爆出匪夷所思嘅調錯嬰醜聞，兩個初生女嬰居然身份互換，兩位媽媽湊錯ＢＢ餵錯奶，嚇到你毛管戙。醫院員工咁識得嚇人，功夫茶建議佢哋去海洋公園扮鬼扮馬客串「全城哈囉喂」。

你以為不斷擺烏龍嘅醫護人員會吸取教訓咩？錯嘞，伊院繼續玩驚嚇。今次係產後病房護士矇查查，將過期卡介苗疫苗幫五個初生嬰兒接種。你知啦，誤服過期藥可大可小，尤其係過期春藥，冇人知道接種過期卡介苗會有乜嘢不良後果。

矇查查擺烏龍嘅具體情況係咁嘅，一般卡介苗疫苗最好喺稀釋之後四小時內使用，事發喺八月二十三日，護士幫五個小寶寶接種之後先至發覺，疫苗原來早於八月二十一日已經稀釋。換言之，接種嘅疫苗過期兩日。

院方事後為五小福檢查身體，好彩福大命大冇乜問題，另外又向一眾父母道歉。跟手，醫管局總裁蘇利民又循例發表聲明，又話深表關注，又話調查事件，不過依照慣例又係冇講處分。

計功夫茶話齋，類似聲明不知見過幾多次，次次熟口熟面。打錯針又發表聲明，輸錯血又發表聲明，割錯胸又發表聲明，齋噏一輪之後情況有冇改善呢？唔好怪功夫茶烏鴉嘴，恐怕醫療失誤只會更多，唔會更少，因為醫管局籠裏雞作反，醫生代表齊齊劈炮！

醫管局有一個協商委員會，由公立醫院醫生代表組成，主要作用係同局方溝通。協商委員會由於不滿醫管局提出跟隨公務員減薪，漠視員方意見之餘，又發出「不減即炒」嘅威脅，所以十六個醫生代表集體總辭，以示抗議咁話。

唉，公務員減薪問題確係亂七八糟一鑊泡，低層唔願減，反而仲想加。至於高層公務員咯喎，扁晒嘴，扭晒計，典床典蓆話減薪打擊士氣喎，而且認為「高減低不減」非常之咁唔公平。更加頭痕嘅係，警隊帶頭爭取逆市加薪，其他紀律部隊人人眼紅妒忌，一個二個好似三歲細蚊仔爭玩具咁樣大嗌「我又要」。

呢嗱嗱嗱，骨牌效應終於砸到連醫管局都冧埋，醫生代表同局方擘面，好明顯又係扁嘴扭計抗拒減薪。家陣大環境係經濟惡劣，失業大軍超過二十萬，公務員唔肯減薪只想加薪已經惹人反感，公立醫院屢爆醜聞，醫療失誤多不勝數，醫生憑乜嘢抗拒減薪？唔炒魷魚都執到啦，吓話！

所以話啫，特區官僚九成係食錯藥，好大可能係過期春藥！