Tommy同太太結伴遊西藏後，尋日孖公仔出席一個電台周年酒會。講起西藏奇遇，Tommy爭住認叻，話體質出奇地Fit，皆因出發前得到一位西醫老友相助，食定幾粒降血壓藥打底，結果兩人去到西藏高原仍然氣定神閒。導遊本來力勸佢哋飛抵拉薩後，抖番幾粒鐘先外出行逛，點知Tommy拍拍心口話唔使，隨即會合大隊四出遊覽寺廟，導遊睇見都嚇一跳。

Tommy仲做埋「零食大使」，將幾大袋預先準備嘅陳皮梅、薑、軟糖、杧果糖等零食派街坊，黨友全程圍住佢攞糖食。Tommy沾沾自喜話：「我話晒係立法會飲食界代表，想『搵食』梗係搵我喇！」咁識賣廣告，真係服咗佢。

同場仲有教育局局長政治助理楊哲安太太張燊悅，燊悅年初誕下女兒Lucy後鮮有出席公開場合，尋日穿着一條淺綠色連身裙，束上緊身皮帶，身形與產前分別不大，佢笑言修身成功全靠每日堅持朝早七點起身湊女，直至晚上七時老公回家後，就改為湊老公，做個廿四孝母親同太太。