今時今日做女人真係唔容易，公私兩忙，壓力有幾大，只有女人才會明白。尋日喺政府總部遇到啱啱出席完施政報告諮詢會嘅高靜芝，作為婦女事務委員會主席嘅Sophia，絕對係典型嘅時代女性，在公在私都處理得頭頭是道，不過佢都講番句老實話：「女人點都鍾意扮靚Shopping！」
最近「女電王」阮蘇少湄證實患上早期乳癌，Sophia都好注重婦檢，佢覺得現今嘅女性公私兩忙，生活壓力好大，所以佢好注重減壓，Sophia嘅減壓方法相當「方便」，每日擘大眼就會做，係咩？唔係「排毒」，係享受工作︰「我好熱愛工作，一做嘢就開心，只要工作就可以令我減壓；做人最緊要識享受，得到快樂就係最好嘅減壓方法。」
工作之餘，Sophia都好鍾意行街Shopping，一個月總會畀半個鐘自己縱情發洩吓︰「以前都仲可以Window Shopping，依家雖然無時間，但女人始終鍾意扮靚，時裝店有靚衫都會幫我留起，等我落去試，不過每次頂多都係得半個鐘，一個月可能先去得一次，幾忙都要去，咁樣先無對自己唔住。」佢仲補充多句：「女人一定要學識錫自己，最緊要靚！」