立法會海濱規劃事宜小組委員會原定喺九月底至十月初，去美加四個沿海城市訪問，考察當地嘅海濱規劃同管理，點知原先報咗名嗰七名議員當中，竟然有多達四人臨時褪軚唔去，據聞部分建制派議員係因為行程橫跨十月一日，決定退團，間接導致整個美加外訪計劃可能要改期押後。

其中一位甩底團友阿涂嘅情況就較為特別，佢同我哋講，因為佢定咗喺十二月舉行嘅婚禮，好多嘢都未搞掂，如果佢再唔留港趕工，佢未來老婆肯定嬲死佢。佢又話原先諗過去台灣影婚紗相，貪佢又近又多靚景，加上佢過往咁多次去台灣，唔係睇選舉就係做交流，冇真正輕輕鬆鬆周圍睇過，想順道去玩番轉，點知又撞正當地發生風災，依家都未決定去唔去。唔知佢會唔會考慮吓去美加海濱影相呢？