阿Greg未入官場前，喺政黨組織過樂隊，尋日佢到中心Band房參觀時特別感興趣，呢個時候人群中忽然有人慫恿佢試吓玩，佢一開始都話：「唔好啦，我嚟參觀。」不過轉個頭就問職員「有冇鼓棍」，仲隨即「埋位」露番兩手。原來阿Greg嘅音樂底子頗深厚，九歲開始學鋼琴，中學學埋結他同朋友夾Band，直到做咗律師後先開始學打鼓。

上任一年 難忘兩事

政制及內地事務局出年會檢討副局政助嘅薪酬，按表現調薪。阿Greg話：「呢份工唔係用錢嚟量度，只要做到應該做嘅嘢，發揮到潛能就已經係好大收穫。」做咗一年副局，有兩件事令佢好難忘，第一係為護照風波開記招前一晚，舊同事幫佢搞咗個歡送會，搞到佢記招當日心情七上八落難以平復；另一件事係今年初代表香港出席世貿非正式部長級會議，令佢覺得十分榮幸。

卓妮